QƏHRƏMANLAR UNUDULMUR- Şəhid Cavadov Cəlil

21 Noy 2020 19:14
1465

Cəlil Ağaddin oğlu Cavadov 29 mart 1989-cu ildə Lerik rayonunda anadan olmuşdur.  Atası Ağaddin Sənan oğlu Cavadov hüquqşunas olmuş və Lerik rayon qeydiyyat idarəsinin rəisi vəzifəsində işləmişdir. Cəlilin uşaqlıq illəri rayonun Xəlifəkücə kəndində keçmişdir. O, 13 yaşında olarkən hər iki valideynini itirmiş və həyatın çətinliklərini görməyə başlamışdır. Orta təhsilini şəhid Zəfər Səfərov adına Blaband kənd orta məktəbində almış, 2003-cü ildə orta məktəbin 8-ci sinifini bitirərək C. Naxçanski adına hərbi liseyə qəbul olmuşdur. 2006-cı ildə liseyi bitirərək H. Əliyev adına Ali Hərbi Məktəbə qəbul olmuş və 2010-cu ildə motoatıcı ixtisası üzrə bitirmişdir. 


2010-2011-ci illərdə Silahlı Qüvvələrin Təlim Tədris Mərkəzində ixtisasartırma kursunu keçmişdir.
2011-2014-cü illərdə Ağdam istiqamətində tağım komandiri olmuşdur.
2014-2016-cı illərdə baş-leytenant hərbi rütbəsində Ağdam istiqamətində bölük komandiri vəzifəsində işləmişdir.  
2016-2017-ci illərdə Bərdə rayonunda yerləşən hərbi hissədə qərərgah bölüyünün komandiri vəzifəsində işləmişdir.
2017-2018-ci illərdə Qazax rayonunda yerləşən hərbi hissədə tabor komandirinin maddi-texniki təminat üzrə müavini vəzifələrində xidmət etmişdir.
2018-ci idən 2020-ci ilin mart ayına qədər Qaradağ rayonunun ərazisində yerləşən "N" saylı hərbi hissədə uçot əməliyyat bölməsinin rəisi vəzifəsində xidmət etmişdir.
2020-ci ilin mart ayında Qusar rayonunda yerləşən hərbi hissədə tabor komandirin müavini vəzifəsinə təyin olunmuşdur. 
2020-ci ilin aprel ayında baş-leytenant rütbəsindən kapitan hərbi rütbəsinə yüksəlmişdir.


II Qarabağ müharibəsində, 2020-ci il 27 sentyabrdan etibarən tabor komandiri müavini vəzifəsində Füzuli, Qubadlı, Cəbrayıl, Hadrut istiqamətlərində yüksək igidlik və rəşadətlə döyüşmüşdür. 
Döyüş yoldaşları məlumat verir ki, kapitan Cavadov bu döyüşlərdə daim öndə vuruşmuş, dəfələrlə öz həyatını təhlükəyə ataraq düşmən nəzarətində olan yaralı hərbiçilərimizi çıxarmaqla onların həyatını xilas etmiş, şəxsi heyətin itkilərinin az olması üçün əlindən gələni etmişdir.

Kapitan Cavadov nümunəvi xidmətinə görə II dərəcəli "Qüsursuz xidmətə görə", III dərəcəli "Qüsursuz xidmətə görə", "Azərbaycan Silahlı Qüvvələrinin 95 illiyi" yubiley və "Azərbaycan Ordusunun 100 illiyi" yubiley medalları ilə təltif edilmişdir.

Bir aylıq şanlı döyüşdən sonra oktyabr ayının 27-də C.Cavadov 14 nəfərlik qrupu ilə Xocavənd rayonunun Cütçü kəndi ərazisindəki starateji yüksəkliyin işğaldan azad edilməsi uğrunda hücuma keçmişdir. Cəlil qrupunda yaralanmış bir hərbçiyə ilkin tibbi yardım göstərilməsi və onun döyüş meydanından çıxarılması üçün operativ tədbir görərək yenidən döyüşü davam etdirmişdir.  Ağır döyüşdə mühasirəyə düşən C.Cavadov əlində olan silah-sursatla düşmənə sarsıdıcı zərbələr endirmiş və xeyli sayda canlı qüvvəsini məhv etmişdir. Qeyri-bərabər döyüşdə düşmən gülləsinə tuş gələn igid komandir Cəlil Cavadov Azərbaycan Respublikasının ərazi bütövlüyü uğrunda canından keçməklə qəhrəmancasına şəhid olmuşdur.

Prezident İlham Əliyev Azərbaycan Respublikası Silahlı Qüvvələrinin hərbi qulluqçularının medallarla təltif edilməsi haqqında imzaladığı Sərəncama əsasən, Azərbaycan Respublikasının ərazi bütövlüyünün təmin edilməsi uğrunda döyüş əməliyyatlarında iştirak etmiş və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirmiş Azərbaycan Respublikası Silahlı Qüvvələrinin hərbi qulluqçusu, Lerik rayonunun Xəlifəkücə kəndində anadan olan kapitan Cəlil Ağaddin oğlu Cavadov ölümündən sonra "İgidliyə görə", "Füzulinin azad olunmasına görə" və "Vətən uğrunda" medalları ilə təltif edilib. Allah qəhrəman komandir, kapitan Cəlil Cavadova rəhmət eləsin. Vətən sağ olsun!

Şəhidin böyük qardaşı Cavid müharibə ərəfəsində onunla olan xatirələri belə yada salır: "Hər dəfə Cəlil ilə danışanda mənə "Paytaxta az qalıb, hər şey yaxşıdır, narahat olma. Ancaq irəliyə doğru hərəkət edirik" -deyirdi. Şuşanı paytaxt adlandırırdı. Oktyabr ayının 9-da kiçik qardaşım Fərid mənimlə əlaqə saxlayıb, mənə "Cavid, Cəlilgili aşağı düşürüblər, onun yanına getmək olur. Gedən Cəlilin yanına" -dedi. Oktyabr ayının 10-da Cəlilin yanına getdik. 3-4 saat biz bir yerdə olduq. Mən ona "Cəlil, biraz ehtiyatlı ol, özünü qoru. Sən komandirsən, sən arxadan kamanda verirsən yəqin. Həm özünü, həm də əsgərlərini qoru" -dediyim zaman, mənə "Cavid, bu döyüş, bu müharibə irəli müharibəsi deyil. Bu müharibə ardımca müharibəsidir" -cavabını verdi. Şəhid olduğu zaman da, dediyi kimi şəhid oldu...". 

Qardaşı Cavadov Cavid 1983-cu il yanvar ayının 16-da Lerik rayonunun Xəlifəkücə kəndində anadan olmuşdur. Hərbçidir. 

2012-ci ildən aviasiya hərbi hissəsində xidmət edir. Baş gizir Cavid hal-hazırda Qalada yerləşən hərbi hissədə qullu edir. Ailəlidir, 3 övladı var. Kiçik qardaşı Fərid Cavadzadə dövlət qulluqçusu kimi xalqa, dövlətə xidmət edir. Allah qorusun!
                                    Ambur.az

Oxşar xəbərlər